Попладнево силно невреме проследено со интензивни врнежи од дожд, ветер и електрични празнења ,го зафати кичевскиот регион За четириесеттина минути сообраќајниците во градот се претворија во мали реки, а во пониските делови на градот се слеваа големи количини на дождовница.
За овој период сообраќајот во градот се одвиваше отежнато, но без поголеми застои.
Дождот придонесе да се намалат температурите и животот на граѓаните да биде многу поподнослив.
До крајот на денот ќе има локална појава на пороен дожд и грмежи, особено во планинските подрачја во западна Македонија, а од нестабилност ќе бидат зафатени и делови од Скопското подрачје. Во вечерните и ноќните часови времето постепено ќе се стабилизира, соопшти Управата за хидрометеоролошки работи.
Локален пороен дожд со грмежи УХМР регистрираше попладнево во делови од Пелагонија, во Охридско-Преспанскиот регион, во планинските делови од Охрид, преку Кичево до езерото Козјак и Јакупица, како и изолирана појава во планинските делови од источна Македонија. Во овие моменти појава на нестабилност има и на Скопска Црна Гора.
Утре времето ќе биде сончево со мала до умерена облачност, попладне со локален краткотраен пороен дожд и грмежи. Ќе дува слаб до умерен ветер од североисточен правец. Утринската температура во земјава ќе биде во интервалот од 14 до 21, а дневната од 30 до 37 степени и вредност на УВ индекс 8.
