Демократската унија за интеграции (ДУИ) денеска до Државната изборна комисија (ДИК) поднесе листи на кандидати за пратеници за сите девет изборни единици, шест во Македонија и три во дијаспората.
Првпат за овие парламентарни избори партијата има кандидати и за третата и за четвртата изборна единица.
Носител на листата во првата изборна единица е Ермира Мехмети, а веднаш зад неа е Рафиз Алити.
Во втората изборна единица, носител на листата е Реџаил Исмаили, а во третата, Беџихудин Шехаби.
Носител на листа во четвртата изборна единица е координаторот на досегашната пратеничка група, Неџати Јакупи.
Во изборната единица број 5, носител на листата е Муса Џафери, а зад него е Рамиз Мерко.
Партискиот лидер, Али Ахмети, ја предводи листата во шестата изборна единица, а по него е Хазби Лика.
Талат Џафери е на четвртата позиција на оваа листа, а Џеват Адеми на петтата.
На полноќ завршува рокот за поднесување на листи за кандидати на пратеници за предвремените парламентарни избори закажани за 27 април.
